Ceyhun Mirzəyev 9 aprel 1946-cı ildə Ağdam rayonunun Abdal-Gülablı kəndində anadan olub.
Bir vaxt rejissor Tofiq Tağızadə “Görüş” filmi üçün uşaq axtaranda Ceyhunun oxuduğu məktəbə gəlir və Ceyhunu bəyənir. 9 yaşlı Ceyhun 1955-ci ildə ilk dəfə “Görüş” filmində Şıxəlinin uşaqlarından birini canlandırır. Daha sonra o, Azərbaycan Televiziyasında uşaq verilişlərində iştirak edirdi. Rejissor Həbib İsmayılov belə verilişlərin birində Mirzəyevi görür və onu “Ögey ana” filmində İsmayıl roluna dəvət edir.
“Ögey ana” filmindən sonra Ceyhun “Əsl dost”, “Matteo falkone”, “Qara qağayı”, “Yenilməz batalyon”, “Qanun naminə”, “Dəli Kür”, “Bakıda küləklər əsir”, “Yol əhvalatı”, “Qanlı zəmi”, “Lətifə” filmlərində, ümumən 25-ə qədər filmdə müxtəlif obrazlar yaradır.
Mirzəyevin rejissor kimi də fəaliyyəti olub. Azərbaycan Dövlət İncəsənət İnstitutunun rejissorluq fakültəsini bitirdikdən sonra Ceyhun Mirzəyev Moskvada təcrübə keçib və daha sonra “Mozalan” satirik kinojurnalı üçün süjetlər çəkib, jurnalın bədii rəhbəri olub. Ceyhun Mirzəyev rejissor kimi 100-dən çox süjet çəkib. Aktyor, həmçinin parodiyaçılıq qabiliyyətinə malik olub.
Ceyhun Mirzəyevin son filmi “Fəryad” olub. O, həm filmin rejissoru olub, həm də “İsmayıl” rolunu canlandırıb. Film çəkilişlərinin birində C.Mirzəyev özünü pis hiss edib və evə güclə çatdırılıb. O, filmin premyerasını görmədən 5 mart 1993-cü ildə vəfat edib və Yasamal qəbiristanlığında dəfn olunub.
