Son 20 ildə Azərbaycanda 435 məscid tikilib. Bunu Dini Qurumlarla İş üzrə Dövlət Komitəsinin sədri Mübariz Qurbanlı jurnalistlərə açıqlamasında bildirib.
Bu barədə 21 dekabr tarixində Report məlumat verib.
M.Qurbanlının sözlərinə görə, Azərbaycan müstəqilliyini bərpa edən zaman cəmi 17 məscid fəaliyyət göstərirdi: "Dövlətimizin din sahəsində siyasəti tolerantlığa əsaslanıb. Bu gün isə ölkədə 2 253 məscid var. Yüzlərlə məscid Heydər Əliyev Fondu tərəfindən təmir olunaraq, vətəndaşların istifadəsinə verilib".
M.Qurbanlı bildirib ki, azad edilən ərazilərdə də bərpa işləri davam edir: "Bir neçə müddət əvvəl Şuşada Yuxarı Gövhər Ağa məscidinə imam təyin edilib. Digər işğaldan azad edilən ərazilərdə də təmir-bərpa işləri tamamlandıqdan sonra təyinatlar baş tutacaq".
