Sumqayıt Ağır Cinayətlər Məhkəməsində vəzifəli şəxslərdən hədə-qorxu ilə pul tələb etməkdə təqsirləndirilən Sənan Abdullayev və İlqar Atayevin cinayət işi üzrə məhkəmə iclası başlayıb. Bu haqda Report martın 16-da xəbər yayıb.
Məhkəmə prosesinə sədrlik edən hakim Rəşad Əliyev özü özünə etiraz edib. O, bildirib ki, təqsirləndirilən şəxslərdən biri onun yaxın tanışı olduğundan, iş obyektiv qiymətləndirilməyəcək. Etiraz təmin olunub.
Qeyd edək ki, Abdullayev Sənan Həsən oğlu və Atayev İlqar Əliabbas oğlu 2021-ci ilin avqustunda saxlanılıblar.
S. Abdullayev youtube-da yaratdığı “Xəbər kanalı” səhifəsində birgə çəkiliş apardığı İ. Atayevlə əlbir olaraq Goranboy Rayon İcra Hakimiyyətinin vəzifəli şəxslərinin guya qanunsuz əməllərə yol vermələrinə dair videolar yaymışlar. Daha sonra videoları silmələri üçün vəzifəli şəxslərdən hədə-qorxu ilə 4 min manat tələb ediblər.
Onlar “qabaqcadan əlbir olan bir qrup şəxs tərəfindən hədə-qorxu ilə tələb etmə” və “təkrar hədə-qorxu ilə tələb etmə” maddələrilə ittiham olunublar.
