Ötən ay 16 nəfər günvurma və istivurma ilə bağlı Sumqayıt Tibb Mərkəzi Təcili və Təxirəsalınmaz Tibbi Yardım Stansiyasına müraciət edib. Bu barədə 10 avqust tarixində Sumqayıt Tibb Mərkəzi məlumat yayıb.
Müraciətlərin 15-i Sumqayıtdan, 1-i isə Novxanı kəndi ərazisindəndir. Onlardan 8-i qadın, 8-i kişi, 10 nəfəri böyük, 6-sı uşaq olub və xəstələrə lazımi tibbi yardım göstərilib.
Müraciət edən böyüklərdən 5 nəfəri Sumqayıt Tibb Mərkəzinin Təcili Yardım Xəstəxanasına hospitalizasiya olunub.
Uşaqlardan biri Sumqayıt Tibb Mərkəzinin Uşaq Xəstəxanasına, digəri isə Novxanı bağlarındakı təcili yardım briqadası tərəfindən Bakı şəhər 2 saylı Uşaq xəstəxanasına hospitalizasiya edilib.
Son günlərdə isə 1 nəfər uşağın günvurması ilə bağlı Sumqayıt Tibb Mərkəzinin Təcili və Təxirəsalınmaz Tibbi Yardım Stansiyasına müraciət olunub. Ona lazımi tibbi yardım göstərilib.
Əhaliyə günəş şüasının intensiv vaxtlarında, yəni 14:00-dan 16:00-dək gün altına çıxmamaları, yüngül geyimlərdən istifadə etmələri, bol meyvə və tərəvəzlər, sərin şirələr və maye qəbul etmələri tövsiyə olunub.
