Sumqayıtda transformatorda baş vermiş yanğın nəticəsində şəhərin bir hissəsində elektrik enerjisinin verilişi dayandırılıb. Bu barədə 15 avqust tarixində Report məlumat verib.
Ötən gün axşam saatlarında şəhərin 16-cı mikrorayon ərazisində ərazini elektrik enerjisi ilə təmin edən transformatorda yanğın baş verib.
Nəticədə mikrorayon ərazisində elektrik enerjisinin verilişi kəsilib və xeyli sayda ev işıqsız qalıb.
Yanğın qısa müddətdə söndürülüb.
Lakin evlərə və mənzillərə elektrik enerjisinin verilişi tam bərpa olunmayıb.
"Azərişıq" ASC-nin “Şimal” Regional Enerji Təchizatı və Satışı İdarəsinin "Sumqayıt Elektrik Şəbəkəsi"ndən bildirilib ki, hazırda qeyd olunan ərazidə təmir-bərpa işləri aparılır.
Qısa zaman ərzində ərazidəki evlər və mənzillər elektrik enerjisi ilə tam təmin ediləcək.
