Müharibə, Əmək və Silahlı Qüvvələr Veteranları Təşkilatının dəstəyi ilə Sumqayıt şəhər Heydər Əliyev Mərkəzində veteranlarla görüş keçirilib. Bu barədə Report 13 yanvar tarixində xəbər verib.
Əvvəlcə şəhidlərimizin əziz xatirəsi bir dəqiqəlik sükutla yad edilib.
Görüşdə çıxış edən Müharibə, Əmək və Silahlı Qüvvələr Veteranları Təşkilatının sədr müavini polkovnik Cəlil Xəlilov veteranlarımızın cəmiyyətdəki rolundan, onların üzərinə düşən vəzifələrdən danışıb.
Diqqətə çatdırılıb ki, Sumqayıtda şəhid ailələri və qazilər daim diqqət mərkəzindədir, onların sosial təminatının və yaşayış imkanlarının artırılması istiqamətində işlər görülür.
Şəhid ailə üzvlərinin, müharibə ilə əlaqədar xəsarət almış hərbi qulluqçuların və əlilliyi müəyyən edilmiş şəxslərin məşğulluğuna və sosial problemlərinin həllinə dəstək olmaq məqsədilə Sumqayıt Şəhər İcra Hakimiyyəti yanında Əlaqələndirmə Mərkəzi yaradılıb.
Digər çıxış edənlər təşkil edilən tədbirin əhəmiyyətindən danışıblar.
