Dövlət Turizm Agentliyi tərəfindən Suqovuşan qəsəbəsinin turizm resursları əsas götürülməklə mövcud su anbarı ətrafında turizm fəaliyyətlərini özündə əks etdirən “Suqovuşan Turizm İnkişaf Konsepsiya” sənədi hazırlanıb. Bu barədə 14 aprel tarixində Report Dövlət Turizm Agentliyinə istinadən məlumat verir.
Su anbarı ətrafında mövcud olan turizm resurslarından istifadə edərək infrastrukturun yaradılması təklif olunur. Burada qonaq evlərinin tikilməsi, yerli sakinlər və qonaqlar üçün sahilyanı zolağın salınması, eləcə də ərazidə aktiv turizm fəaliyyətləri üçün infrastrukturun yaradılması nəzərdə tutulur.
Məlumatda bildirilib ki, ətraf bölgədə məskunlaşan 400 mindən çox insan turist səfərləri həyata keçirir. Onların da 30%-ə yaxını istirahət və əyləncə məqsədilə səyahət edir və ortalama 1-3 gün müddətində vaxt sərf edir. İlkin mərhələdə isə Suqovuşana turist axınının qonşu regionlarda yaşayan əhali hesabına olacağı gözlənilir.
"Gəncə istiqamətindən yerli turistlərin Suqovuşana səfərləri davamlı olaraq gözlənilir. Əlavə olaraq, Suqovuşan Naftalana səfər edən yerli və xarici turistlər üçün əlavə bir günlük rekreasiya imkanları təqdim edə bilər. Naftalandan Suqovuşana xarici turistlərin səfərləri gözlənilir”, - məlumatda bildirlib.
