İlqar Anzor oğlu Mirzəyev 8 may 1973-cü ildə Gürcüstanın Qardabani şəhərində anadan olub.
O, 1980-1990-cı illərdə Qardabanidə orta məktəbdə oxuyub. Mirzəyev 1991-1995-ci illərdə Heydər Əliyev adına Ali Hərbi Məktəbdə təhsil alıb. Daha sonra İlqar Mirzəyev leytenant rütbəsi ilə xidmətə başlayıb. Komandir kimi diviziya birincisi olduqdan bir müddət sonra Mirzəyev mayor rütbəsinə yüksəlib. İlqar Mirzəyev 2003-2005-ci illərdə Azərbaycan Respublikası Silahlı Qüvvələrinin Hərbi Akademiyasında təhsilini davam etdirib. Müxtəlif illərdə Bakı, Gəncə, Naxçıvan, Beyləqan, Goranboy və Şəmkir şəhərlərində xidmət edib.
Xidməti dövründə İlqar Mirzəyev “Azərbaycan Respublikası Silahlı Qüvvələrinin 10 illiyi”, “Azərbaycan Respublikası Silahlı Qüvvələrinin 90 illiyi”, “Azərbaycan Respublikası Silahlı Qüvvələrinin 95 illiyi”, “Hərbi xidmətdə fərqlənməyə görə” III dərəcəli, “Azərbaycan Respublikası Silahlı Qüvvələri Veteranı” və “Qüsursuz xidmətə görə” medallarına layiq görülüb.
Mirzəyev 2016-cı ildə aprel döyüşləri zamanı göstərdiyi şücaət və qəhrəmanlığa görə, polkovnik rütbəsinə yüksəlib. O, həmin vaxt Tərtər rayonu istiqamətində gedən döyüşlərdə iştirak edib. Mirzəyev 23 fevral 2019-cu ildə 3-cü Ordu korpusunun Artilleriya rəisi təyin olunub.
İlqar Mirzəyev 14 iyul 2020-ci ildə Tovuz rayonu istiqamətində gedən döyüşlər zamanı şəhid olub. 15 iyul 2020-ci ildə şəhid Bakıdakı II Fəxri xiyabanda dəfn edilib. 9 dekabr 2020-ci ildə İlqar Mirzəyev “Azərbaycan Milli Qəhrəmanı” fəxri adına layiq görülüb.
14 iyul 2020-ci ildə Tovuz döyüşləri zamanı İlqar Mirzəyevlə birgə general-mayor Həşimov Polad İsrayıl oğlu, mayor Əhmədov Namiq Hajan oğlu, mayor Novruzov Anar Gülverdi oğlu, gizir Zeynallı İlqar Ayaz oğlu, gizir Babayev Yaşar Vasif oğlu, müddətdən artıq həqiqi hərbi xidmət hərbi qulluqçusu əsgər Mustafazadə Elçin Arif oğlu şəhidlik zirvəsinə ucalıblar.
