Türkiyənin məşhur alış-veriş saytı olan “Trendyol”dan Azərbaycana birbaşa çatdırılmalarda gecikmələr yaranıb. “Starex”in Biznesin İnkişafı Departamentinin rəhbəri Pərviz Əzimov məsələyə aydınlıq gətirib.
Bu barədə 15 iyun tarixində Metbuat.az məlumat verib.
Pərviz Əzimov açıqlamasında deyib ki, qeyd edilən problemdən xəbərdardırlar:
“Biz bir neçə gün öncə sosial media hesablarımızdan da bununla bağlı paylaşım etmişdik. Müştərilərimizin problemlərini də bilirik və həlli üzərində işləyirik. Sifarişlərin həcmi artıb, müştərilərə daha yaxşı xidmət göstərə bilmək üçün Türkiyədə yerləşən anbarımızı dəyişərək, daha böyük anbara keçdik. Gecikmələrə səbəb keçid prosesində yaranan ləngimələrdir”.
Pərviz Əzimov yaranmış çətinliklərə görə müştərilərdən üzrxahlıq etdiklərini qeyd edərək bildirdi ki, artıq problemlər tam həllini tapıb və bundan sonra gecikmələr müşahidə olunmayacaq.
Qeyd olunub ki, “Starex” şirkəti hazırda birbaşa “Trendyol”la deyil, onlara məxsus, logistika üzrə Türkiyədəki böyük şirkətlərdən olan “Araz Karqo” ilə partnyorluq edir. Şirkət “Trendyol”un Azərbaycana göndərdiyi məhsulları həm birbaşa ünvanlara, həm filiallar üzərindən, həm də Azərpoçt vasitəsilə çatdırmalarını həyata keçirir.
