Ucarda yarımstansiyadan oğurluq edən üç nəfərdən ibarət dəstə saxlanılıb. Bu barədə İnsanoid Daxili İşlər Nazirliyinin Mətbuat Xidmətinə istinadən bu gün, 15 dekabr tarixində xəbər verir.
Əməli törətməkdə şübhəli bilinən Bakı şəhərinin Qaradağ rayon sakinləri Arif Şirəliyev, Felmar Türbəndəyev və Anar Əhmədov saxlanılıblar.
Hər üç şəxs törətdikləri cinayət əməlini etiraf edib. Aparılan araşdırmalar zamanı məlum olub ki, A.Şirəliyev, F.Türbəndəyev və A.Əhmədov noyabr ayının əvvəlində rayonun Qazıqumlaq kəndi ərazisində yerləşən və istismarda olan 35/10 kV-luq yarımstansiyanın binasına qanunsuz daxil olaraq, 3 ədəd vakuum tipli açarlar oğurlamaqla dövlət müəssisəsinə 10000 manata yaxın maddi ziyan vurublar.
Həmin şəxslərin digər cinayət əməllərinin də üstü açılıb. Belə ki, A.Şirəliyev, F.Türbəndəyev və A.Əhmədov son 6 ay ərzində respublikanın 11 şəhər və rayonu ərazisində analoji faktları törədərək yarımstansiyalardan vakuum tipli açarları oğurlamaqla dövlət müəssisələrinə külli miqdarda zərər vurublar.
Qanunsuz yolla ələ keçirdikləri "qənimətləri" Bakıda dəyərindən ucuz qiymətə sataraq, pulları öz aralarında bölüblər.
Açarların bir qisminin yeri polis əməkdaşları tərəfindən müəyyən edilib və maddi sübut kimi götürülüb.
Faktla əlaqədar cinayət işi açılıb, saxlanılan şəxslər barəsində həbs qətimkan tədbiri seçilib.
Araşdırmalar davam edir.
