Azərbaycan ötən il 18 min tondan çox şəkər idxal edib. Sözügedən məhsul, əsasən, Türkiyə, Rusiya və Ukraynadan alınır. Bəs Rusiya-Ukrayna münaqişəsi ölkəmizin şəkər təminatına təsir göstərə bilərmi? Məsələ barədə martın 18-də Report araşdırma aparıb.
Naxçıvan Muxtar Respublikasının keçmiş kənd təsərrüfatı naziri Rəcəb Orucov bildirib ki, İmişli Şəkər Zavodunda istehsal olunan şəkər Azərbaycanı bu məhsulla tam təmin edə bilər. “İstər Ukrayna, istərsə də Rusiyadan ölkəmizə şəkər idxal olunsa da, buna elə bir yüksək tələbatımız yoxdur. Ona görə də müharibə ilə bağlı təminatımızda bir problem ola biləcəyini düşünmürəm”, - deyə R.Orucov söyləyib.
Lakin o əlavə edib ki, logistika ilə bağlı problemlər qaçılmazdır: “Ölkəmizə gətirilən xam şəkərin logistika yolu məhz münaqişə zonasından keçə bilər”.
Daha öncə “Azərsun Holdinq” MMC-nin Müşahidə Şurasının sədri Abdolbari Gözəl də məsələyə münasibətini bildirmişdi: “Heç bir nigarançılığa yer yoxdur. Ehtiyat anbarlarımız, imkanlarımız var. Bizdə elə böyük yüksəliş, elə böyük qiymət artımları gözlənilmir”.
