Ukraynada qətl törətməkdə təqsirləndirilərək Bakıda saxlanılan idman ustası Yasin Həsənova hökm oxunub və o, 12 il 10 ay müddətinə azadlıqdan məhrum edilib.
Bu barədə 6 iyul tarixində Report məlumat verib.
Qeyd edək ki, Y.Həsənov Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşları tərəfindən həyata keçirilən əməliyyat nəticəsində Bakıda saxlanılıb. O, 2018-ci ilin iyulun 3-də Ukraynanın paytaxtı Kiyev şəhərində yerləşən restoranlardan birində Azərbaycan vətəndaşı Davud Ağayevi “Makarov” markalı tapançadan açılan atəşlə qətlə yetirməkdə şübhəli bilinir. Y.Həsənov Ukrayna Cinayət Məcəlləsinin “qəsdən adam öldürmə” maddəsi ilə beynəlxalq axtarışda olub.
Araşdırma zamanı məlum olub ki, Y.Həsənovun qətlə yetirdiyi şəxslə əvvəlcədən ədavəti olub. Belə ki, 2013-cü ildə Davud Ağayev Yasin Həsənova Kiyev şəhərində odlu silahdan atəş açaraq onu yaraladığından sonuncu intiqam almaq məqsədi ilə bir neçə il sonra qeyd edilən hadisəni törədib.
Y.Həsənov əvvəllər Azərbaycanın cüdo, sambo və pankration döyüşləri üzrə yığma komandalarının üzvü olub. O, dəfələrlə Azərbaycan çempionu olmaqla yanaşı, 2009-cu ildə cüdo üzrə Dünya Kubokunun, sambo üzrə Avropa çempionatının bürünc mükafatçısı olub.
İstintaq orqanı Y.Həsənova Cinayət Məcəlləsinin “bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən adam öldürmə” və “xüsusi amansızlıqla və ya ümumi təhlükəli üsulla adam öldürmə” maddəsi ilə ittiham elan edib.
