İstismara veriləndən cari ilin oktyabr ayının sonunadək Xəzər dənizinin Azərbaycan sektorunda yerləşən "Ümid" qaz-kondensat yatağından təqribən 8,2 milyard kubmetr qaz və 1 milyon 260 min tona yaxın kondensat hasil edilib. Bu barədə Energetika Nazirliyi məlumat verib.
Yataqdan sutkada orta hesabla 6,7 milyon kubmetr qaz və 800 tondan artıq kondensat hasil edilir.
Yatağın qaz ehtiyatları 200 milyard kubmetr, kondensat ehtiyatları isə 40 milyon ton həcmində qiymətləndirilir.
Xatırladaq ki, bu gün "Ümid" yatağının kəşfindən 13 il keçir.
Adıçəkilən yataq Azərbaycanın müstəqillik dövründə Azərbaycan Dövlət Neft Şirkəti (SOCAR) tərəfindən kəşf edilən ilk qaz-kondensat yatağı kimi tarixə düşüb.
