Bu gün XX əsr Azərbaycan ədəbiyyatının görkəmli nümayəndəsi, repressiya qurbanı, lirik şeirlər ustadı Mikayıl Müşfiqin anım günüdür. Dahi şairin ölümdən 87 il keçsə də, onun zəngin və dərin məzmunlu şeirləri hələ də Azərbaycan poeziyasının ən dəyərli incilərindən sayılır.
Müşfiq 1908-ci ildə Bakı şəhərində ziyalı bir ailədə dünyaya göz açıb, atası Mirzə Əbdülqadir İsmayılzadə dönəminin tanınmış ziyalılarından idi. O, uşaqlıq illərini nənəsi Qızqayıt xanımın himayəsində keçirmiş və bu dövr onun zəngin xalq ədəbiyyatına olan sevgisini formalaşdırıb.
[gallery size="full" ids="212983,212976,212977"]
Gənc yaşlarından şeirə maraq göstərən Mikayıl Müşfiq, 1926-cı ildə "Gənc işçi" qəzetində çap etdirdiyi "Bu gün" adlı şeiri ilə yaradıcılığa başlayıb. O, 1930-cu ildə ilk şeir kitabını nəşr edib və 1932-ci ildən sonra daha çox əsərləri ilə tanınıb. Şairin yaradıcılığı yalnız şeirlərlə deyil, həm də bədii tərcümələrlə zəngin olub. O, Aleksandr Puşkin, Taras Şevçenko, Mixail Lermontov və digər klassiklərin əsərlərini Azərbaycan dilinə tərcümə edib.
[gallery size="full" ids="212980,212978,212984"]
Müşfiq həm də uşaq ədəbiyyatına mühüm töhfələr verib, "Şəngül, Şüngül, Məngül" və "Kəndli və ilan" kimi mənzum nağılları, "Vuruşmalar", "Qaya" kimi poemaları ilə tanınıb.
1937-ci ildəki repressiyalar zamanı Mikayıl Müşfiq əsassız ittihamlarla həbs edilib, 1938-ci ildə isə güllələnib. Lakin ölümündən sonra, 1956-cı ildə ona bəraət verilib.
Bu gün Mikayıl Müşfiqin adı müxtəlif abidələr, məktəblər və kitabxanalarla yaşadılır. Onun şeirləri dünya kitabxanalarında qorunur və Azərbaycan ədəbiyyatının ayrılmaz bir parçası olaraq qalır. Müşfiqin həyatı və yaradıcılığı Azərbaycan mədəniyyətinin dəyərli bir hissəsi olaraq qiymətləndirilir.
