Göygöl Mənzil-Kommunal Təsərrüfatı İstehsalat Birliyinin rəisi vəzifəsinə təyinat olub. Bu barədə Report 22 avqust tarixində xəbər verib.
Göygöl Rayon İcra Hakimiyyətinin başçısı Elvin Paşayevin imzaladığı müvafiq sənədə əsasən, həmin vəzifəyə Vətən müharibəsi iştirakçısı Pərvin Rəhimov təyin edilib.
O, iyul ayından etibarən sözügedən qurumda Abonent şöbəsinin qrup rəhbəri vəzifəsində çalışıb.
P.Rəhimov 1992-ci ildə Göygöl rayonunda anadan olub. O, 2010-2014-cü illərdə Bakı Dövlət Universitetinin Tarix fakültəsində Qafqaz ölkələri üzrə Regionşünaslıq (Qafqazşünaslıq) ixtisası təhsili alıb.
2020-ci il sentyabr ayının 27-də başlayan 44 günlük Vətən müharibəsində Xüsusi təyinatlı Qüvvələrin tərkibində iştirak edib.
O, Prezident İlham Əliyevin müvafiq sərəncamları ilə “Cəsur Döyüşçü”, “Şuşanın azad olunmasına görə”, “Kəlbəcərin azad olunmasına görə”, “Füzulinin azad olunmasına görə” və “Cəbrayılın azad olunmasına görə” medalları ilə təltif edilib. Eləcə də “Vətən müharibəsi iştirakçısı” medalı ilə təltif olunub.
