Bu gün, martın 18-də İmişli rayonunun sabiq icra başçısı Vilyam Hacıyevin cinayət işi üzrə məhkəmə iclasında şahidlər dindirilib. Bu haqda Report məlumat yayıb.
Şahid qismində ifadə verən Şıxalı Gülməmmədovun sözlərinə görə, o, sahibkarlıqla məşğul olub və təqsirləndirilən şəxslə yaxınlığı olmayıb: “Qaralar kənd bələdiyyəsinin sədri olmuşam. Araz çayından qum çıxarırdım, sahibkarlıqla məşğul olurdum”.
O bildirib ki, pulu qurumun mühasibatlığına verirdi. Digər şahid Namiq Xankişiyev rayonun abadlaşdırılmasına görə icra hakimiyyətinin əməkdaşı İbrahim Zaidova 1 300 manat pul verdiyini söyləyib.
“Yanacaqdoldurma məntəqəm var idi, onu böyütmək istəyirdim. İcra Hakimiyyətinin mühasibinə müraciət etdim. Dedi ki, bunun üçün 3 min manat verməliyəm”, - deyə uçuncü şahid Hümbət Həsənov bildirib.
Əvvəl İmişli şəhərinin icra nümayəndəsi olan İmran Bəkirov isə Vilyam Hacıyevlə çox yaxın olduğunu qeyd edib. O, bir əməkdaşın işdən çıxarılmaması üçün Cəmil adlı şəxsə 5 min manat pul verib. Əmək müqaviləsinin müddətinin artırılması üçün də eyni məbləği ödəyib.
Məhkəmə davam edir.
Vilyam Hacıyev 2004-2006-cı illərdə Göygöl, 2006-2012-ci illərdə Samux, 2012-ci ildən isə İmişli rayonu İcra Hakimiyyətinin Başçısı vəzifəsində işləyib. O, 2020-ci il mayın 5-də Dövlət Təhlükəsizliyi Xidməti tərəfindən saxlanılıb və vəzifə cinayətləri ilə birgə qanunsuz silah saxlamaqda da təqsirli bilinib.
