Xaçmaz, Yevlax və Samux rayonlarında məişət tullantılarının qalaqlanaraq yandırılması faktları aşkarlanıb. Bu haqda 24 iyul tarixində Dövlət Ekoloji Təhlükəsizlik Xidməti məlumat yayıb.
Faktlar Xaçmaz rayonunun Nərəcan kəndində "Aysberq" kafesinin ətrafında, Yevlax rayonunun Aran qəsəbəsindəki avtoyuma məntəqəsinin yaxınlığında və Samux rayonunun Kolayır kəndindəki dərədə qeydə alınıb.
Xaçmaz və Yevlax rayonlarında tullantılar iaşə obyektlərinin əməkdaşları tərəfindən ətraf ərazilərə atılıb. Samux rayonunda isə tullantıların dərəyə Samux Mənzil Kommunal Təsərrüfatı və İstehsalat Birliyinə (MKTİB) məxsus yük maşınından boşaldıldığı müəyyən edilib.
Faktlarla bağlı “Aysberq” kafesinin istifadəçisi Namik Əsədov, avtoyuma məntəqəsinin işçisi Cəsarət Zülüyev və Samux MKTİB-nin yük maşınının sürücüsü Qara Əliyev barəsində akt, protokol tərtib olunaraq qanunamüvafiq tədbirlər görülüb.
Ərazilərin təmizlənməsi və mütəmadi nəzarət olunması ilə bağlı hər üç müəssisənin məsul şəxslərinə məcburi göstəriş verilib, Samux MKTİB-nin rəhbərliyinə isə sürücülərin fəaliyyətini nəzarətdə saxlaması üçün ciddi xəbərdarlıq olunub.
