Nəcibə Məlikova 25 oktyabr 1921-ci ildə Bakı şəhərinin Buzovna qəsəbəsində anadan olub.
O, uşaqlıqdan həkim olmaq istəyirdi. Lakin bu istəyi mümkün olmadığından Nəcibə xanım aktrisa olmaq qərarına gəldi. Sənətkar 1943-cü ildə Bakı Teatr Məktəbində Xalq artisti Fatma Qədrinin sinfini bitirərək, Gəncə Dövlət Dram Teatrında işləməyə başlayıb. Məlikovanın Cəfər Cabbarlının “Yaşar” əsərində oynadığı Yaqut obrazı onun Gəncə teatrında ən uğurlu işi sayılır.
Gəncədə bir neçə tamaşada çıxış etdikdən sonra aktrisa Bakıya qayıdıb. Nəcibə Məlikova Azərbaycan Dövlət Teatr İnstitutuna daxil olaraq, 1951-ci ildə oranı bitirib. Həmin təhsil müəssisəsində aktrisa Ədil İsgəndərovdan, Rza Təhmasibdən dərs alıb. Təhsil aldığı illərdə Akademik Milli Dram Teatrının tamaşalarında epizodik rollar oynayan aktrisa, 1952-ci ildən bu teatrda çalışmağa başlayıb. Burada o, Hüseyn Cavidin “Şeyx Sənan” tamaşasında Xumar, “Səyavuş”da Firəngiz, Cəfər Cabbarlının “Aydın”ında Böyükxanım, “Sevil”də Edilya, Sabit Rəhmanın “Əliqulu evlənir”də Yasəmən və başqa obrazları yaradıb.
Nəcibə Məlikova kinoaktrisa kimi də tanınıb. Məlikova “Ögey ana”da Dilarə, “Aygün”də Aygün, “Arşın mal alan”da Cahan xala, “Əhməd haradadır?”da Nərgiz xala və digər filmlərdə müxtəlif rolları canlandırıb.
Aktrisa 1959-cu ildə Əməkdar artist, 1974-cü ildə isə Xalq artisti fəxri adlarına layiq görülüb.
Nəcibə Məlikova 27 iyul 1992-ci ildə vəfat edib və İkinci Fəxri xiyabanda dəfn olunub.
Mənbələr:
1. https://portal.azertag.az/az/encyclopedia/post/21511
2. https://kulis.az/xeber/media/eri-basqasi-ile-evlendi-intim-teklife-gore-rejissora-sille-vurdu-meymundan-qorxub-xesteliye-tutuldu-xalq-artisti-haqqinda-maraqli-faktlar-39564
