Yaponiya Yeni Xocavənd qəsəbəsində və Neftçalada məktəblər tikəcək. Bu barədə 29 avqust tarixində Report xəbər verib.
Yaponiya hökumətinin “Ot Kökləri və İnsan Təhlükəsizliyi” qrant yardımı proqramı çərçivəsində Xocavənd rayonunun Yeni Xocavənd qəsəbəsində və Neftçala rayonunun Qırmızıkənd kəndində məktəblərin təmiri və əlavə məktəb binasının inşası layihələrinin icrası planlaşdırılır.
Beyləqan rayonundakı Yeni Xocavənd qəsəbə məktəbində 6 sinif otaqlı və sanitar qovşaqlı əlavə məktəb binasının tikintisi və mövcud məktəb binasının qaz istilik sistemi ilə təmin edilməsi üçün “Azərbaycan İcma inkişafı üzrə araşdırmalar, təlim və resurs mərkəzi” İctimai Birliyinə 91.297 ABŞ dolları (154.293 manat) ayrılıb.
Neftçala rayonunun Qırmızıkənd kənd məktəbinin 7 sinif otaqlı, anbarlı və sanitar qovşaqlı əlavə məktəb binasının tikintisi üçün isə “Azərbaycan Gənc Alim, Doktorant və Magistrlər Cəmiyyətinə” 90.513 ABŞ dolları (152.968 manat) məbləğində qrant ayrılıb.
Xocavənd rayonunun Yeni Xocavənd qəsəbəsi xocavəndli məcburi köçkünlərin məskunlaşması və Xocavənd rayonunun administrativ funksiyalarının icrası üçün Beyləqan rayon ərazisində salınan yaşayış sahəsidir.
