“Yevlax KOB evi” tərəfindən sahibkarlara 35 minə yaxın xidmət göstərilib. Bu haqda aprelin 8-də Kiçik və Orta Biznesin İnkişafı Agentliyinin (KOBİA) saytında məlumat verilib.
Göstərilən xidmətlərin 94%-i “G2B” (Hökumətdən-sahibkarlığa) xidmətlərinə, 6%-i isə “B2B” (Biznesdən biznesə) xidmətlərinə aid olub.
“Yevlax KOB evi” artıq bir ildir ki, fəaliyyət göstərir. Burada sahibkarlara 220-dək xidmət göstərilir. Sözügedən KOB evinə daha çox Yevlax, Bərdə, Mingəçevir və Ağdaşdan olan sahibkarlar müraciət edirlər.
Göstərilən xidmətlər sırasına biznes fəaliyyəti ilə bağlı lazım olan biznesin qeydiyyatı, vergi məsələləri, sahibkarlıq fəaliyyəti üçün lisenziyalar və mənşə sertifikatı, əmlakın dövlət reyestrindən çıxarışı, aqrar sahə üzrə subsidiyalar, açıq məkanda reklamın yerləşdirilməsinə icazə, qida təhlükəsizliyi sertifikatı, kommunal xidmətlər, bank və digər xidmətlər daxildir.
Hazırda Azərbaycanda Xaçmaz və Yevlax şəhərlərində olmaqla iki KOB evi fəaliyyət göstərir.
