Yevlaxda mal-qara oğurlamaqda şübhəli bilinən şəxslər saxlanılıblar. Bu barədə 12 avqust tarixində İnsanoid-ə Daxili İşlər Nazirliyindən bildirilib.
Hadisə rayonun Qaramanlı kəndindəki fermaların birində qeydə alınıb. Fermadan 20 baş xırdabuynuzlu heyvan itib.
Heyvanların həmin fermada əvvəllər işləyən şəxslər tərəfindən oğurlandığı məlum olub. Oğurluq əməlini törətməkdə şübhəli bilinən Şəki rayon sakini İlqar Həşimov saxlanılıb, onunla əlbir olan digər şəxsin isə şəxsiyyəti müəyyən edilib və saxlanılması istiqamətində polis əməkdaşları tərəfindən tədbirlər davam etdirilir.
Bundan başqa, rayonun Yuxarı Bucaq kəndində yerləşən şəxsi təsərrüfatdan isə 2 baş iribuynuzlu heyvan oğurlanıb. Qeyd edilən əməli törətməkdə şübhəli bilinən həmin kənd sakinləri Zaur Əjdərli və Vüsal Cəfərov saxlanılıblar.
Onların iribuynuzlu heyvanları mal bazarında dəyərindən ucuz qiymətə satdıqları müəyyən edilib. Həmin heyvanlar aşkarlanaraq sahibinə qaytarılıb.
Bu əməliyyatlar zamanı vətəndaşlara 6 min manatdan artıq ziyan dəydiyi aşkar edilib.
Faktlarla bağlı cinayət işləri başlanılıb, araşdırmalar aparılır.
