BP şirkətinin Zəngilan-Cəbrayıl zonasında tikəcəyi 240 MVt gücündə günəş elektrik stansiyasının tikilməsi (GES) təxminən 200 milyon ABŞ dollarına başa gələcək. Bu barədə 16 mart tarixində Report Energetika Nazirliyi yanında Bərpa Olunan Enerji Mənbələri Dövlət Agentliyinin direktoru Təbriz Əmmayevə istinadən məlumat verib.
Onun sözlərinə görə, layihənin dəyəri, əsasən, burada istifadə ediləcək panellərin qiymətindən asılıdır: “Ola bilsin, həmin vaxta qədər panellər ucuzlaşsın”.
Qeyd edək ki, 2021-ci ilin iyun ayında Energetika Nazirliyi və BP GES-in tikinti layihəsinin qiymətləndirilməsi və həyata keçirilməsi fəaliyyəti üzrə əməkdaşlığa dair İcra Müqaviləsi imzalayıblar. Bu sənədə işğaldan azad olunmuş ərazilərdə “yaşıl enerji” zonasının yaradılması, Azərbaycanın bərpa olunan enerji sektorunun inkişafı ilə bağlı strateji qərarı və 2030-cu ilədək karbon qazı emissiyalarını 35%-dək azaltmaq öhdəliyinin, BP-nin isə 2050-ci ilədək “xalis sıfır emissiya”lı şirkətə çevrilmək strategiyasının icrası çərçivəsində imza atılıb.
