Zaqatala sakini, Əməkdar mədəniyyət işçisi Rəşid Ələkbərov evinin həyətində Heydər Əliyev Muzeyi yaradıb. Bu barədə Report 10 may tarixində xəbər verib.
Muzeydə ümummilli liderin həyat və yaradıcılığını əks etdirən 500-ə yaxın fotoşəkil nümayiş olunur.
74 yaşlı R.Ələkbərov 40 il ərzində dahi liderin xarici səfərlərdə və ölkə daxilində keçirdiyi görüşlər, qatıldığı tədbirlər zamanı çəkilən fotolarını toplayıb. Daha sonra muzey yaradıb.
O bildirib ki, 1983-cü ildə kəndirbaz kimi İçərişəhərdə çıxış edərkən Heydər Əliyevin diqqətini çəkib və orada ulu öndərlə görüşüb. Həmin görüşdən sonra həyatında hər şey dəyişib:
“Mən uzun illərdir ki, bu fotoları toplamaqla məşğul olmuşam. 1983-cü ildə Heydər Əliyev Sovet İttifaqı Kommunist Partiyası Mərkəzi Komitəsi Siyasi Bürosunun üzvü və SSRİ Nazirlər Soveti sədrinin birinci müavini işləyəndə İçərişəhərdə təşkil olunan Xalça bayramına gəlmişdi. Mən də həmin tədbirdə kəndirbaz kimi öz nömrələrimi nümayiş etdirirdim. Mərasimdən sonra ulu öndər mənimlə görüşdü. Dedi ki, cavan oğlan, halaldır sənə ki, bu ata-baba sənətini davam etdirirsən”.
R.Ələkbərov vurğulayıb ki, bu görüşdən sonra H.Əliyevə olan hörmət və ehtiramı daha da artıb, ulu öndərin fotolarını toplamağa başlayıb.
“Yeddidən yetmiş yeddiyə, hər kəsin sevgisini qazanan ulu öndər Heydər Əliyev bütün Azərbaycan xalqının qəlbində daim yaşayır və bundan sonra da yaşayacaq”, - o deyib.
[URIS id=115406]
