“Zığ" Gəmi Təmiri və Tikintisi Zavodunun 61 saylı üzən tərsanəsində təmir işləri aparılarkən zavodun 5 əməkdaşı qazdan zəhərlənib. Bu barədə İnsanoid APA-ya istinadən bu gün, 4 iyun tarixində xəbər verir.
Hadisə ötən gün saat 17:00 radələrində baş verib.
Üzən tərsanədə işləyən 4 işçidən səs gəlmədiyini görən növbədə duran Yolçuyev Namik Əli oğlu həmkarlarının arxasınca tərsanənin ballastının nasos bölməsinə daxil olub, lakin o da qazdan zəhərlənib.
Dərhal əraziyə 9 təcili tibbi yardım briqadası yönləndirilib.
5 nəfərin həkiməqədər ölümü qeydə alınıb. Zərərçəkən 2 nəfər isə tüstüdən zəhərlənmə diaqnozu ilə Kliniki Tibbi Mərkəzin Toksikologiya şöbəsinə hospitalizasiya olunub.
Azərbaycan Respublikası Baş Prokurorluğu hadisə ilə bağlı araşdırma aparır.
Nəticəsi barədə ictimaiyyətə əlavə məlumat veriləcək.
