Azərbaycan SSR Dövlət Mükafatı laureatı, Azərbaycan SSR Əməkdar incəsənət xadimi, ssenarist, şair, tərcüməçi Alla Axundova vəfat edib.
Alla Axundova 27 oktyabr 1939-cu ildə Moskvada anadan olub. O, 1970-ci ildən Azərbaycan Yazıçılar Birliyinin, 1971-ci ildən isə Rusiya Kinematoqrafçılar İttifaqının üzvü olub.
Ədəbi fəaliyyətinə görə 1970-ci ildə Azərbaycan SSR Dövlət Mükafatına layiq görülüb, 1988-ci ildə Azərbaycan SSR Əməkdar incəsənət xadimi fəxri adını alıb.
Şairənin "Ağ şəfəq", "Bazar günü bağçası", "Həvvanın sözü", "Təbiət mənzərələri", "Pillələr", "İstirahət bağı", "Üzün cizgiləri, beş povest" və digər kitabları işıq üzü görüb. Onun əsərləri dünyanın müxtəlif xalqlarının dillərinə tərcümə olunub.
Alla Axundova qədim türk eposları ilə yanaşı, ingilis, ərəb və gürcü dillərindən nümunələri də rus dilinə tərcümə edib. O, Vaqif Səmədoğlu, Bəxtiyar Vahabzadə, Kamal Abdulla, Fikrət Qoca, İsa İsmayılzadə və digər Azərbaycan ədiblərinin əsərlərini rus dilinə çevirib. Şeirləri isə ingilis, rumın, fransız, Azərbaycan, ərəb və yapon dillərinə tərcümə olunub.
"Sirr. Sirr. Sirr" pyesi və "Çöhrənin ifadəsi" nəsr əsəri də Alla Axundovanın yaradıcılıq nümunələri sırasındadır.
O, bir sıra qısametrajlı və cizgi filmlərinin ssenari müəllifi olub. "Şərikli çörək" filmi Alla Axundovanın ilk ekran işi hesab olunur. O, həmçinin "Alma almaya bənzər" filminin ssenarisini yazıb.
