3 oktyabr 2020-ci ildə Azərbaycan Silahlı Qüvvələri mühüm strateji əhəmiyyətə malik Suqovuşanı işğaldan azad etdi. Həmin gün Madagiz adı dəyişdirilərək, tarixi adı – Suqovuşan bərpa edildi.
İlham Əliyevin 29 dekabr 2020-ci ildə və 24 iyun 2021-ci ildə imzaladığı müvafiq Sərəncamlara əsasən, bir qrup hərbi qulluqçu "Suqovuşanın azad olunmasına görə" medalı ilə təltif edilib.
Suqovuşan 1923-cü ildə Ağdərə rayonunun inzibati ərazisinə kənd kimi daxil edilib. 1943-cü ildə şəhər tipli qəsəbə statusu alıb. 1992-ci ildə Ağdərə rayonu ləğv edilib, onun ərazisi qonşu Ağdam, Tərtər və Kəlbəcər rayonları arasında bölüşdürülüb. Həmin zaman Suqovuşan Tərtər rayonuna birləşdirilib.
Suqovuşan ilk dəfə 1991-1992-ci illərdə Azərbaycan Ordusu tərəfindən işğaldan azad olunub. Lakin 1994-cü ilin aprel ayında ermənilər yenidən Suqovuşanı işğal ediblər.
Suqovuşan qəsəbəsinin ərazisində Suqovuşan su anbarı, "Suqovuşan-1" və "Suqovuşan-2" Kiçik Su Elektrik stansiyaları yerləşir.
