2024-cü il noyabrın 1-nə olan məlumata görə, ölkə iqtisadiyyatında muzdla çalışan işçilərin sayı 1 773,3 min nəfərə çatıb.
Muzdla işləyənlərin sektorlara görə paylanması belədir: 18,6 faizi ticarət və nəqliyyat vasitələrinin təmiri, 18,4 faizi təhsil, 12,8 faizi sənaye, 8,5 faizi səhiyyə və sosial xidmətlər, 6,8 faizi tikinti, 6,4 faizi dövlət idarəetməsi, müdafiə və sosial təminat, 4,3 faizi nəqliyyat və anbar təsərrüfatı, 3,8 faizi peşə, elmi və texniki fəaliyyət, 3,2 faizi kənd təsərrüfatı, meşə təsərrüfatı və balıqçılıq, 2,2 faizi isə maliyyə və sığorta fəaliyyəti ilə məşğul olub. Digər iqtisadi fəaliyyət sahələrində isə ümumi işçilərin 15,0 faizi çalışıb.
2024-cü ilin yanvar-oktyabr aylarında ölkə iqtisadiyyatında muzdla çalışanların orta aylıq nominal əməkhaqqı əvvəlki ilin eyni dövrünə nisbətən 7,8 faiz artaraq 993,2 manat təşkil edib.
Ən yüksək orta aylıq nominal əməkhaqqı mədənçıxarma sənayesi, maliyyə və sığorta fəaliyyəti, peşə, elmi və texniki fəaliyyət, informasiya və rabitə, həmçinin nəqliyyat və anbar təsərrüfatı sahələrində qeydə alınıb.
