Antimonopoliya və İstehlakçıların Hüquqlarının Müdafiəsi Dövlət Xidməti rəqabət qanunvericiliyinin tələblərini pozduqlarına görə altı təsərrüfat subyekti barəsində tədbirlər görüb.
Qurumdan İnsanoid.com-a verilən məlumata görə, daxil olan şikayətlər əsasında “Baku Electronics” MMC, “ABC Telecom”, “Trust Lux”, həmçinin fərdi sahibkarlar Pərviz Quliyev, Vüsal Qurbanov və Dadaş Vəliyev barəsində ilkin araşdırma aparılıb. Yoxlamalar nəticəsində ədalətsiz rəqabət faktları aşkarlanıb və inzibati icraat başladılıb.
Şirkətlərin yol verdiyi pozuntular
“Baku Electronics”
Şirkət “YOSHIRO” markalı məişət texnikasını reklam edərkən məhsulun guya Yaponiyada istehsal edildiyini iddia edən “Yapon ənənəsi”, “Yapon keyfiyyəti” kimi ifadələrdən istifadə edib. Halbuki məhsullar Çin və Özbəkistanda istehsal olunur. Bu, istehlakçıların aldadılması və rəqabət tələblərinin pozulması kimi qiymətləndirilib.
“ABC Telecom”
Şirkət “HOFFMANN” markalı isidiciləri alman istehsalı kimi təqdim edərək oxşar şəkildə istehlakçıları yanlış yönləndirib.
“Trust Lux”
“Y.A.Ş” brendi altında satılan santexnika məhsulları Türkiyə istehsalı kimi təqdim olunub, lakin faktiki istehsal ölkəsi Çindir. Türkiyə ilə assosiasiya yaradan vizual elementlərdən istifadə edilməsi də pozuntu hesab edilib.
Digər qanun pozuntuları
Pərviz Quliyev sosial şəbəkələrdə və fəaliyyət obyektində “ZAGAR BAKU” əmtəə nişanından qanunsuz istifadə edib.
Vüsal Qurbanov digər istehsalçıya məxsus “AUX” brendindən icazəsiz istifadə edərək “AUXs” adı ilə saxta kondisionerlər satışa çıxarıb. Məsələ materialları Baş Prokurorluğa göndərilib.
Dadaş Vəliyev süd məhsullarında “İvanovka” coğrafi göstəricisindən qanunsuz istifadə edib. “İvanovka” ekologiyası və keyfiyyəti ilə tanınan bir kənd olduğu üçün bu addım məhsulun süni şəkildə nüfuzunun artırılması kimi qiymətləndirilib.
Qurumun qərarı
Bütün subyektlərə pozuntuların aradan qaldırılması və təkrar hallarına yol verilməməsi barədə məcburi göstərişlər verilib.
