ABŞ-də anasına böyrəyini bağışlayan qadına geni dəyişdirilmiş donuz böyrəyi uğurla köçürülüb.
"New York Times" xəbərinə görə, "Langone Health"in cərrahları tərəfindən səkkiz il donor orqanı gözləyən 53 yaşlı Alabama sakini Tovvana Luneyə uğurla əməliyyat olunub. Transplantasiya Şükran günündən əvvəl baş tutub və xəstə əməliyyatdan 11 gün sonra evə buraxılıb.
Transplantasiya üzrə mütəxəssislər bu hadisəni diqqətlə izləyirlər, çünki bu uğur kliniki sınaqların başlanmasını sürətləndirə və donor orqan çatışmazlığını azaltmağa kömək edə bilər. Əməliyyatdan sonra xəstə dializdən azad olub və təzyiqi sabit qalıb.
Xəstəxanadan verilən məlumata görə, uğurlu transplantasiyadan sonra xəstəyə köçürülən böyrək orqan kimi fəaliyyətə başlayıb. Luney əməliyyatdan sonra özünü daha yaxşı hiss etdiyini və əvvəlki yorğunluq hissini yaşamadan gündəlik işlərini görə bildiyini qeyd edib.
Langone Transplant İnstitutunun direktoru Dr. Robert Montqomeri və transplantasiya üzrə cərrah Dr. Ceymi Lokk əməliyyatı idarə ediblər. Dr. Lokk bildirib ki, Luneyin qanında yüksək anticisim səviyyəsi olduğuna görə uyğun insan böyrəyi tapmaq çətin idi.
