Ukrayna Prezidenti Vladimir Zelenskinin fərmanı ilə Rusiya müğənniləri Nikolay Baskov və Filipp Kirkorov "Ukraynanın Xalq Artisti" fəxri adından məhrum ediliblər.
İnsanoid.com xəbər verir ki, bu barədə Zelenskinin rəsmi saytında məlumat verilib.
Bundan əlavə, Rusiya müğənnisi Aleksandr Malinin və bəstəkar İqor Krutoy da "Ukraynanın Xalq Artisti" adından məhrum ediliblər. Zelenski, həmçinin, Ukraynada doğulmuş və Rusiyada məşhurlaşmış müğənnilər Ani Lorak və Taisiya Povalini "Ukraynanın Əməkdar Artisti" statusundan məhrum edib.
Ümumilikdə, Zelenskinin fərmanı ilə əvvəlcə 34 nəfərə verilmiş müxtəlif dövlət mükafatları və fəxri adlar ləğv edilib. Onların arasında keçmiş Ukrayna rəsmiləri, deputatlar, sənətçilər, dini xadimlər və hüquqşünaslar var.
Bundan əvvəl, Kirkorovun mətbuat katibi müğənninin məhkəmə icraçıları tərəfindən yol hərəkəti qaydalarının pozulmasına görə 30-dan çox ödənilməmiş cərimə səbəbindən təqib edilməsini səhv adlandırmışdı.
