Yaponiyada yay fəslində yaşanan ekstremal istilərdən sonra, məşhur Fuji Dağı tarixdə ən uzun müddət qarsız qalıb.
İnsanoid.com Yaponiya Meteorologiya Agentliyinə istinadən xəbər verir ki, 29 oktyabr tarixinə qədər dağın zirvəsində qar müşahidə olunmayıb ki, bu da son 130 ildə ən uzun qarsız dövr olaraq qeyd olunub.
Adətən, Fuji Dağı 2 oktyabr tarixində qarla örtülməyə başlayır və keçən il qar ilk dəfə 5 oktyabrda müşahidə edilmişdi. Lakin "Kofu" yerli meteoroloji ofisinin proqnozçusu Yutaka Katsutanın dediyinə görə, bu il isti hava səbəbindən dağın zirvəsində hələ də qar örtüyü formalaşmayıb: "Bu vəziyyət, əvvəlki 26 oktyabr rekordunu aşaraq 1894-cü ildən bu yana müşahidə olunan ən gec qar dövrü olaraq tarixə düşüb",- deyə proqnozçu əlavə edib.
Katsuta, yay mövsümündə yüksək temperaturun sentyabr ayına qədər davam etdiyini və bunun soyuq hava axınlarına maneə törətdiyini bildirib. O, iqlim dəyişikliyinin bu gecikməyə təsir göstərmiş ola biləcəyini də əlavə edib.
Yaponiya bu yay tarixdə ən isti yayını yaşayaraq iqlim dəyişikliyi ilə əlaqədar yaranan istilik dalğalarının təsirinə məruz qalıb. Normalda ilin böyük hissəsini qarla örtülü olan Fuji Dağı, iyul-sentyabr ayları ərzində səyahətçilərin ən çox ziyarət etdiyi yerlərdən biridir. Lakin bu il, yapon hökumətinin turizmi azaltmaq üçün giriş haqqı və günlük ziyarətçi sayı məhdudiyyəti tətbiq etməsi səbəbindən dağa çıxanların sayı azalıb.
Simmetrik forması ilə tanınan Fuji Dağı, məşhur Hokusayın "Böyük Dalğa" əsəri də daxil olmaqla, bir çox sənət əsərində ölümsüzləşdirilib. Təxminən 300 il əvvəl vulkan püskürməsi yaşayan bu dağ, hələ də dünyanın ən çox ziyarət edilən təbii möcüzələrindən biridir.
