Haitidə silahlı dəstələrin həyata keçirdiyi hücum nəticəsində 110 nəfər həyatını itirib.
"Reuters" xəbər agentliyinin məlumatına görə, hücum "Uarf Jeremi" dəstəsinin başçısı Monel Feliksin göstərişi ilə baş verib.
Hadisəyə səbəb kimi Feliksin azyaşlı oğlunun ölümündə yaşlı bir falçını günahlandırması göstərilir. Vudu ayinləri ilə məşğul olan cadugərlərdən biri ona bu iddianı çatdırdıqdan sonra Feliks dəstə üzvlərinə Siti-Soleil bölgəsindəki bütün yaşlı falçıların öldürülməsi əmrini verib.
Rəsmi məlumatlara əsasən, qurbanların hamısı 60 yaşdan yuxarı şəxslərdir. Haitinin ən yoxsul və təhlükəli bölgələrindən biri olan Siti-Soleil ərazisinə əsasən silahlı dəstələr nəzarət edir. Burada yaşayan əhali kənar dünya ilə əlaqə qurmaqda çətinlik çəkir və tez-tez cinayətlərin qurbanına çevrilir.
Haiti hökuməti silahlı dəstələrlə mübarizədə ciddi çətinliklər yaşayır. 2022-ci ildə yerli hüquq-mühafizə orqanlarına dəstək üçün beynəlxalq yardım tələb edilsə də, 2023-cü ildə göndərilən BMT missiyasının imkanlarının məhdud olduğu qeyd edilir. Bu səbəbdən bölgədə cinayətlərin qarşısını almaq hələ də çətin olaraq qalır.
