Ötən gün İrəvanda keçirilən iki etiraz aksiyasında ümumilikdə 16 nəfər saxlanılıb. Bu barədə 20 sentyabr tarixində Report Ermənistan KİV-yə istinadən məlumat verib.
Bildirilib ki, 11 nəfər hökumət binası yaxınlığında, 5 nəfər isə Rusiya səfirliyi yaxınlığında saxlanılıb.
Daha əvvəl hökumət binasının qarşısına 500 etirazçının toplaşdığı barədə məlumat verilmişdi. Onlar hökumət əleyhinə şüarlar səsləndiriblər. Nümayişçilərlə polis arasında toqquşma nəticəsində 16 polis daxil olmaqla 34 nəfər xəsarət alıb.
Xatırladaq ki, ötən gün axşam saatlarında Rusiyanın İrəvandakı səfirliyinin binasına giriş-çıxış etirazçılar tərəfindən bağlanmışdı. Diplomatik nümayəndəlik tədbir görmək üçün Ermənistan Xarici İşlər Nazirliyinə nota göndərib.
