London İmperial Kollecinin alimləri aşkar ediblər ki, artıq çəki problemi olan kişilər yaddaşlarını qadınlardan 10 il daha tez itirə bilərlər.
Demensiya adətən 75 yaşdan sonra müşahidə olunur. Lakin "Journal of Neurology Neurosurgery & Psychiatry" jurnalında yayımlanan tədqiqatın nəticələrinə görə, piylənmə kişilərdə bu prosesi daha erkən yaşlara çəkə bilər.
Tədqiqat göstərib ki, artıq çəkili kişilərdə beyin funksiyalarının zəifləməsi 55-74 yaş aralığında başlayır, qadınlarda isə oxşar dəyişikliklər 65-74 yaş arasında müşahidə edilir.
Alimlər təcrübə iştirakçılarının beyin həcmini və bədənlərindəki piy miqdarını MRT vasitəsilə analiz ediblər. Nəticələrə əsasən, artıq piy beyin həcminin kiçilməsi ilə əlaqələndirilir və bu, sinir hüceyrələrinin itkisinə və onların əlaqələrinin zəifləməsinə səbəb olur. Bu vəziyyət xüsusilə kişilərdə daha qabarıq görünür.
