2019-cu ildəki yanğından sonra bərpa edilmiş Paris Müqəddəs Məryəm Kilsəsinin (Notr-Dam kilsəsi) geniş açılış mərasimi gücləndirilmiş təhlükəsizlik tədbirləri ilə keçiriləcək.
İnsanoid.com xəbər verir ki, bu barədə paytaxtın polis prefekturasının rəisi Loran Nunyes bildirib.
O vurğulayıb ki, kilsənin yerləşdiyi Site adasının ətrafındakı qapalı perimetrin mühafizəsi üçün 6 min polis və jandarma əməkdaşı cəlb olunacaq.
Onlardan əlavə, yaxın ərazilərdə hərbçilər və xilasedicilər növbə çəkəcəklər. Dekabrın 8-nədək bir neçə metro stansiyası bağlanacaq və adada və Senanın sol sahilyanı məhəllələrində avtomobil hərəkəti tam dayandırılacaq. Sağ sahildə isə nümayəndə heyətlərinin keçidi zamanı vaxtaşırı bağlanmalar olacaq. Adaya yalnız piyada getmək mümkün olacaq, lakin kilsənin qarşısındakı meydana insanlar yalnız dəvətnamə ilə buraxılacaq.
Təhlükəsizlik perimetri daxilində bütün restoranlar və suvenir mağazaları bağlı olacaq. Bəzi müəssisə sahibləri bütün həftəsonu ərzində gəlir itirəcəklərindən narazı olsalar da, dünyanın müxtəlif ölkələrində yayımlanacaq geniş mərasimin gələcəkdə daha çox turist sayəsində itkiləri qismən kompensasiya edəcəyinə ümid edirlər.
