Türkiyənin Kassasiya Məhkəməsi sosial şəbəkələrdə qarşı cinsə məxsus foto və paylaşımları bəyənməyin ailə etimadına zərər vurduğunu və boşanma üçün əsas təşkil etdiyini rəsmən təsdiqləyib. Bu barədə “Haber Türk” məlumat yayıb.
Hadisə Kayseri şəhərində bir cütlüyün qarşılıqlı boşanma iddiası zamanı üzə çıxıb. Qadın həyat yoldaşını sosial şəbəkədə başqa xanımın fotolarını bəyənməkdə, ona maddi yardım etməməkdə və sədaqətsizlikdə ittiham edib. Kişi isə həyat yoldaşının atasını təhqir etdiyini, həddindən artıq qısqanclıq etdiyini və sosial şəbəkədə onu narahat edən şərhlər yazdığını bildirib.
Birinci instansiya məhkəməsi əsas günahın kişidə olduğunu müəyyən edib. Apellyasiya məhkəməsi də bu qərarı qüvvədə saxlayaraq, qarşı cinsin fotolarının bəyənilməsinin etimada zərbə vurduğunu bildirib.
Sonda iş Kassasiya Məhkəməsinə göndərilib və əvvəlki qərar dəyişdirilmədən qüvvədə saxlanılıb. Qadına 30 min lirə (təxminən 1200 manat) maddi, 30 min lirə (təxminən 1200 manat) isə mənəvi təzminat ödənilməsinə, həmçinin hər ay 1 000 lirə (təxminən 40 manat) aliment verilməsinə qərar verilib.
Qeyd edək ki, qadın ilkin olaraq 500 min lirə (təxminən 20 min manat) təzminat və 5 min lirə (təxminən 200 manat) aliment tələb edib.
