İspaniya Futbol Federasiyası (RFEF) cümə axşamı günü bəyan edib ki, LaLiqanın bu həftəsonu Valensiya bölgəsində keçirilməsi planlaşdırılan bütün oyunlar LaLiqanın xahişi ilə yenidən planlaşdırılacaq.
İnsanoid.com İspaniya mediasına istinadən xəbər verir ki, ölkə rəhbərliyi bu həftəki şiddətli yağışların ardınca 104 nəfərin ölümü və "çox sayda insanın" itkin düşməsi səbəbindən üç günlük matəm elan edib.
Şənbə günü keçirilməsi planlaşdırılan "Vilyarreal" – "Rayo Valyekano" oyunu, eləcə də "Levante"nin bazar ertəsi ikinci divizionda "Malaqa" ilə ev oyunu da təxirə salınıb.
LaLiqa isə faciəvi daşqın qurbanlarına hörmət əlaməti olaraq həftəsonu oynanacaq bütün oyunlardan əvvəl bir dəqiqəlik sükutun keçiriləcəyini elan edib.
