Cənubi Koreya kəşfiyyatının məlumatına görə, Rusiya Şimali Koreyaya hava hücumundan müdafiə raketləri və digər hərbi texnologiyalar göndərib.
"The Guardian" nəşri yazır ki, bu, Pxenyanın Ukraynadakı müharibədə Rusiyaya dəstək məqsədilə 10 min əsgər göndərməsinə qarşılıq olaraq həyata keçirilib.
Cənubi Koreyanın milli təhlükəsizlik müşaviri Şin Von-sik bildirib ki, bu addım Şimali Koreyanın zəif hava müdafiə sistemini gücləndirmək məqsədi daşıyır. Şin həmçinin qeyd edib ki, Pxenyan müxtəlif iqtisadi yardımlar alıb və casus peyk proqramı üçün Rusiya texnologiyasına sahib ola bilər.
Rusiya və Şimali Koreya liderləri arasında iyun ayında imzalanan qarşılıqlı yardım sazişi hər iki ölkənin hücum halında dərhal hərbi yardım göstərməsini nəzərdə tutur. Cənubi Koreya kəşfiyyatı Şimali Koreya əsgərlərinin artıq Rusiyanın hava-desant və dəniz piyadaları bölmələrinə təhkim edildiyini və bəzilərinin döyüşlərdə iştirak etdiyini bildirir.
ABŞ və Cənubi Koreya Rusiya ilə Şimali Koreya arasında nüvə və raket texnologiyalarının ötürülməsi ehtimalından narahatdır. Bununla yanaşı, Cənubi Koreyanın Milli Kəşfiyyat Xidməti avqust ayından bəri Şimali Koreyanın Rusiyaya 13 mindən çox konteyner artilleriya, raket və digər silah-sursat göndərdiyini açıqlayıb.
