Rusiyanın Krasnoyarsk diyarında dəhşətli bir hadisə baş verib. 17 yaşlı məktəbli qız öz həyətində saxlanılan donuzlar tərəfindən parçalanaraq öldürülüb. Hadisə 23 noyabr axşamı baş verib. Qız evdə tək qaldığı vaxt təsərrüfat işlərinə baxmaq və heyvanları yemləmək üçün donuzların saxlanıldığı yerə gedib.
Bu barədə "Baza" Telegram-kanalı məlumat yayıb.
İlkin istintaq məlumatlarına görə, aqressiv bir donuz qızı yerə yıxıb. Qız yıxılan zaman başı yerə dəyib və huşunu itirib. Bu vaxt digər donuzlar ona hücum ediblər. Qız bud arteriyasının cırılması səbəbindən qanaxmadan dünyasını dəyişib.
Valideynləri həmin vaxt Krasnoyarsk şəhərində olublar. Onlar qızları zənglərə cavab verməyəndə narahat olublar və bir tanışlarından onu yoxlamağı xahiş ediblər. Tanış şəxs gəldikdə, donuzların saxlanıldığı yerdə qızın parçalanmış meyiti aşkarlayıb. Valideynlər bildiriblər ki, hadisəyə səbəb olan donuz əvvəllər də aqressiv davranışı ilə seçilib.
Hadisə ilə bağlı araşdırma aparılır.
