“Şahdağ” Turizm Mərkəzində dağlıq ərazidə yerləşən attraksionlardan biri - “Amerikan təpəcikləri” adlı əyləncə qurğusunda texniki nasazlıq baş verib. Nəticədə bir neçə nəfər şaxtalı hava şəraitində relslərin ortasında köməksiz vəziyyətdə qalıb.
İnsanoid.com xəbər verir ki, sosial şəbəkələrdə yayılan video görüntülərdə insanların kömək gözlədiyi anlar əks olunub. Hadisə şahidləri nasazlığın səbəbini anlamadıqlarını və texniki yardımın gecikməsindən narazı olduqlarını bildiriblər.
Məsələ ilə bağlı Minval.az-a açıqlama verən turizm mərkəzinin mətbuat katibi Orxan Bədəlov bildirib ki, bu, nasazlıq deyil, texniki problem olub və cəmi bir neçə dəqiqə davam edib. Onun sözlərinə görə, problem texniki heyət tərəfindən qısa müddətdə aradan qaldırılıb və attraksion yenidən işə salınıb.
“Rəhbərlik bu cür halların təkrarlanmaması üçün nəzarət tədbirlərinin gücləndirilməsi ilə bağlı göstəriş verib”, - deyə Bədəlov qeyd edib.
Qeyd edək ki, bu, cari mövsümdə “Şahdağ” dağ-xizək kompleksində qeydə alınan ilk məlum hadisədir.
