Bəşər Əsəd rejiminin devrilməsindən sonra Suriyadakı dəhşətli cinayətlərə dair yeni faktlar üzə çıxmağa davam edir.
"Haberler.com"un məlumatına görə, minlərlə insanın işgəncə nəticəsində həyatını itirdiyi Sednaya həbsxanası ilə bağlı yeni dəhşətli məlumatlar insanları sarsıdıb.
Araşdırmalara əsasən, siyasi məhbusların saxlanıldığı həbsxanada işgəncə alətləri və məhkum meyitlərinin sulfat turşusu ilə əridildiyi kütləvi məzarlıqlar aşkar edilib. Tanınmış suriyalı fəal Mazen Hamadinin də bu qurbanlardan biri olduğu müəyyən edilib.
Hamadinin faciəvi taleyi xüsusilə diqqət çəkir. 2012-ci ildə rejim əleyhinə etirazlara qoşulduğu üçün həbs olunan fəal, həbsxanada ağır işgəncələrə məruz qalıb. 1,5 il işgəncə çəkdikdən sonra 2013-cü ilin sentyabrında azadlığa buraxılan Hamadi daha sonra Niderlanda köçərək başına gələnləri dünyaya çatdırıb. Əfvdən ümidlənərək vətəninə qayıtmaq qərarına gəlsə də, 2020-ci ildə Suriyaya döndükdən sonra müəmmalı şəkildə yoxa çıxıb.
Bu faktlar beynəlxalq insan haqları təşkilatları tərəfindən geniş şəkildə araşdırılır və Əsəd rejiminin müharibə cinayətləri kimi qiymətləndirilir. Dünyanın bir çox ölkəsində rejimin məsuliyyətə cəlb olunması tələb edilir.
