Respirator qrip və ya tənəffüs yolu qripi əsasən influensia viruslarının səbəb olduğu, yuxarı tənəffüs yollarına təsir edən bir xəstəlikdir. Bu xəstəlik insanlar arasında öskürək, asqırıq və digər tənəffüs yolları ifrazatları vasitəsilə çox asanlıqla yayılır. Amma son zamanlarda insanlar arasında yayılan virus təkcə qrip deyil. Çünki havaların soyuması özü ilə bərabər müxtəlif növ virusların yayılmasına da səbəb olur.
Bəs yeni yayılan virus nədir? Bundan necə qorunmaq olar? Son zamanlar yayılan virusları necə ayırd etmək mümkündür?
Mövzu ilə bağlı Bakuplus.az–a açıqlama verən həkim-terapevt Sübhan Hacıyevin sözlərinə görə, qış aylarında bir çox pasiyentlərin müraciətləri zamanı üst tənəffüs yollarının virus infeksiyalarına yoluxduğu aşkar edilir:
“Daha çox qrip, adenevirus, renovirus, paraqrip, eyni zamanda pandemiyasını yaşadığımız koronavirus də ola bilər. Eyni simptomlar aşkarlanır. Bəzən həkimlər üçün də ayırmaq çətin olur. Pasiyentlərdə daha çox yüksək hərarət, boğaz ağrısı, burun axıntısı, öncə quru öskürək, sonra isə bəlğəmli öskürəklər olur.
Əzginlik, bədəndə halsızlıq və ağırlıq hiss olunur. Bu cür pasiyentlərin adətən immun sistemi bu xəstəliklərə cavab verdiyi üçün 1-3 gün müddətində sağala bilirlər. Əgər 3 gündən çox ağırlaşma dönəmi, hərarət 38,5 olarsa, həkimə getmələri tövsiyə olunur”.
S.Hacıyev qeyd edib ki, bu cür xəstəliklərdən qorunmaq üçün istər uşaqlar, istərsə də böyüklərə hər zaman tövsiyə edirik ki, şəxsi gigiyenalarına diqqət olunsun:
“Əllərinin yuyulması çox önəmlidir. Toplumlardan maksimum dərəcədə qaçmaq lazımdır. Özünü nasaz hiss edən şəxs tibbi maskadan istifadə etməlidir ki, ətrafda olan sağlam insanları da yoluxdurmasın.
Xroniki xəstəlikləri – xüsusilə də ürək-damar xəstəliyi, şəkərli diabet və digər nevroloji, allergik xəstəlikləri olan insanlar özlərini daha çox qorumalıdırlar. Xəstəliklərini nəzarətdə saxlamalı və mütləq şəkildə yuxu rejiminə diqqət olunmalıdır. Gün ərzində 2-3 litr maye qəbul edilməlidir. İmmun sistemi aktivləşdirən, C, D mikroelementlərindən istifadə edilməlidir. Mövsümə uyğun geyinməli və qidalanmaq lazımdır. Bu zaman xəstəliklərdən qoruna bilərik”.
Nəzrin Vahid
