Xorvatiyanın Zaqreb şəhərində yerləşən Preçko ibtidai məktəbində baş verən dəhşətli hadisə ölkədə dərin kədərə səbəb olub.
İnsanoid.com Xarici KİV-lərə istinadən xəbər verir ki, 19 yaşlı gənc məktəbə daxil olaraq bıçaqla müəllim və şagirdlərə hücum edib. Nəticədə yeddi yaşlı bir uşaq həyatını itirib, beş nəfər - üç uşaq və iki böyük yaralanıb.
Yaralılar dərhal xəstəxanaya çatdırılıb. İlkin məlumatlara görə, müəllimin vəziyyəti kritik idi, lakin son xəbərlərə əsasən, bütün yaralıların vəziyyəti sabitləşib. Hadisədən sonra qaçmağa çalışan cinayətkar polis tərəfindən saxlanılıb.
Hadisə yerində bir neçə polis patrulu və təcili yardım maşını müşahidə olunub. Məktəbin yaxınlığında həyəcan siqnalları eşidilib. Şagirdlər təcili şəkildə evakuasiya edilib, Preçkodakı digər məktəblər də təhlükəsizlik məqsədilə müvəqqəti bağlanıb. Hadisə yerinə ən azı altı təcili yardım maşını və bir təcili yardım helikopteri cəlb olunub.
Hadisənin şahidlərinə əsasən, cinayətkar qaçmağa çalışıb, lakin polis tərəfindən tezliklə yaxalanıb. Zaqreb polisinin məlumatına görə, "gənc şəxs" kəsici alətlə müəllim və bir neçə şagirdi yaralayıb. Hadisə yerində təcili tibbi yardım göstərilib.
"Saat 9:50 radələrində Preçko ərazisindəki təhsil müəssisəsində gənc şəxs kəsici alətlə müəllimi və bir neçə şagirdi yaralayıb. Hücum edən şəxs polis nəzarətindədir. Yaralılar dərhal tibbi yardım alıblar," - deyə Zaqreb polisi bildirib.
Xorvatiyanın bəzi media orqanları əvvəlcə cinayətkarın məktəbin beşinci sinif şagirdi və ya 15 yaşlı yeniyetmə olduğunu yazıb. Lakin sonradan məlumat dəqiqləşdirilərək onun məktəb şagirdi olmadığı bildirilib. Cinayətkarın qara geyimdə olduğu və hazırda Sveti Duh xəstəxanasında müalicə aldığı ehtimal edilir.
