Yaşlı insanlardan soruşsaq, boşanmanın pis, bədbəxt bir hadisə olduğunu deyəcəklər. Elə bir çoxumuz bu düşüncə ilə böyüdüyümüz üçün boşanma adı gələndə qəribə yanaşırıq. Lakin zaman keçdikcə boşanma insanlar arasında adi hala çevrilir. Hətta indiki dövrdə evliliyini sonlandıran bir çox şəxs buna görə yığıncaq təşkil edir. Sanki artıq bir ailənin dağılması, nikahın pozulması bayram sayılır.
Bunun səbəbi nədir? Niyə “boşanma partiləri” dəb halını alıb?
Bununla bağlı İnsanoid.com-a açıqlama verən sosioloq Lalə Mehralı fikirlərini belə izah edib:
[gallery link="file" columns="1" size="full" ids="218252"]
“Əslində bu hallar bir az da şouya maraqlı olmağımızdan qaynaqlanır. Baxın, nəzər yetirsək, görərik ki, son dövrlər insanların diqqətini çəkmək, şou yaratmaq üçün cinsiyyət (gender parti), doğum evindən çıxış, ilk diş kimi növbənöv yığıncaqlar təşkil edirlər. Məsələn, övladının diş çıxarmasını niyə qohum-əqrəbanı yığıb qeyd edəsən? İnsanlar hər şeyi hamı ilə qeyd etməyə maraqlıdırlar.
Son zamanlar boşanma məsələləri də bu tip vüsət alıb. Boşanma ailə məsələsidir, şəxsi həyatdır. Niyə bunu toy kimi qeyd edəsən?!
Səbəbini sizə izah edim: Bu tip yığıncaqları insanların düşüncəsinə, beyninə yeritdilər. İnsanlar indi boşanmanı azadlıq, bayram kimi qəbul edirlər. Evliliyin isə asılılıq olduğunu düşünürlər. Boşananda azadlığa, xoş günə çıxdıqlarını düşünüb qeyd etməyə başlayırlar. Bu yığıncaqları çəkib insanlara təbliğ etdikcə hər kəsin şüuraltına yeridildi.
Boşandığı üçün yığıncaq keçirənləri sorğu-sual etsəniz, çox adi səbəblərə görə evliliyini sonlandırdığını görərsiniz. Çünki artıq insanlar problemləri həll etmək əvəzinə hər şeyi dağıtmağı, məhv etməyi üstün tuturlar”.
Bəs, bunun psixoloji tərəfi necədir? Bu yığıncaqların keçirilməsinə xarici təsir varmı?
Saytımıza açıqlama verən psixoloq Aytən Ələkbərova qeyd edib ki, bunlar gənc nəslin şüursuz düşüncələrindən yaranır:
[gallery link="file" columns="1" size="full" ids="218253"]
“Bəli, o dövrdə qızı boşanan ailə dost-tanış içinə çıxmağa utanardı. Amma bu günlərdə boşanma üçün yığıncaqların keçirilməsi gənc nəslin şüursuz düşüncələrindən irəli gəlir. Bunların dəb halını alması isə psixoloji “qonşudan geri qalma” prinsipindən yaranır. Bir-birinə baxıb müəyyən addımları təkrarlayan adamlara aid etmək olar. Biri boşanır, yığıncaq keçirir və bunu çəkib el-aləmə göstərir. Baxanlar da görür ki, heç kim onu qınamadı. Özü də həvəsə düşür. Beləcə bu yığıncaqlar dəb halını alır”.
Fidan İlqar
