Abşeronda içməli sudan qanunsuz istifadə halları aşkarlanıb. Bu barədə İnsanoid 14 avqust tarixində Azərsu ASC-yə istinadən məlumat verir.
Masazır qəsəbəsində fərdi yaşayış evlərinin tikintisi ilə məşğul olan şəxslər tərəfindən tikilən 6 həyət evinin sudan qanunsuz istifadə etdiyi məlum olub.
Həmin şəxslər texniki şərt almadan, müqavilə bağlamadan ətrafda yaşayan digər vətəndaşların su xəttinə birləşmə edərək suyu talayıblar. Hər bir həyət evinə edilmiş birləşmələr qəza briqadası tərəfindən ləğv edilib.
Xırdalan şəhərinin Heydər Əliyev prospektində yerləşən “50 qəpik” restoranının sudan qeyri-qanuni istifadə etdiyi aşkarlanıb.
Sudan qanunsuz istifadəyə görə əvvəllər 2 dəfə dəymiş ziyan aktı yazılsa da, sahibkar qanunsuz əməlindən əl çəkməyib. Su sayğacını şəbəkədən qeyri-qanuni şəkildə ayıran sahibkar yaxınlıqdakı parkda yaşıllıqların suvarılması üçün nəzərdə tutulan xətdən özbaşına istifadə edib.
Masazır qəsəbəsinin Qaçaq Nəbi küçəsində “Meyvəli” meyvə-tərəvəz satışı məntəqəsinin də sudan qeyri-qanuni istifadə etdiyi müəyyən olunub.
Xırdalan şəhərinin Heydər Əliyev prospekti, 34A ünvanında yerləşən avtoyuma məntəqəsinin sahibi texniki şərt almadan, müqavilə bağlamadan sudan qeyri-qanuni istifadə edib.
