Gəncənin Ticarət Mərkəzində nöqsanlar aşkar edilib. Bu barədə İnsanoid 11 avqust tarixində Azərbaycan Qida Təhlükəsizliyi Agentliyinə (AQTA) istinadən məlumat verir.
Gəncə şəhərinin V.Xuluflu küçəsi, 77 ünvanında yerləşən “Gəncə Bazar Store” MMC-yə məxsus “Grand Qafqaz” Ticarət Mərkəzində planlı yoxlama keçirilib.
Bu zaman burada qida təhlükəsizliyi sahəsində texniki normativ hüquqi aktların tələblərinin pozulduğu, mütəmadi olaraq təmizlik və dezinfeksiya işlərinin aparılmadığı, gigiyena qaydalarına ciddi riayət olunmadığı, süd və süd məhsullarının antisanitar vəziyyətdə yerdən yığılaraq saxlanıldığı, satışı həyata keçirilən qida məhsullarının yararlılıq müddətinə riayət edilmədiyi, kərə yağı adı altında istehlakçılara bitki tərkibli spred yağların (Almaniya, Yeni Zelandiya, Moskva, Ancor) təqdim edildiyi müəyyən olunub.
Həmçinin qida məhsullarının emalı yerlərinin, qida məhsulları ilə təmasda olan səthlərin təmirli vəziyyətdə olmadığı və dezinfeksiya işlərinin aparılmasına imkan verəcək şəkildə qurulmadığı, satışı həyata keçirilən ət məhsullarının mənşəyinin məlum olmadığı, işçilərin xüsusi geyimlə təmin edilmədiyi aşkar edilib.
Faktla bağlı inzibati protokol tərtib edilib və icrası məcburi göstərişlər verilib.
[gallery link="file" size="full" ids="125282,125284,125281"]
