Azərbaycan badmintonçuları Tacikistanda keçirilən beynəlxalq turnirdə 1 gümüş və 2 bürünc medal qazanıblar.
Bu barədə İnsanoid bu gün, 12 avqust tarixində Azərbaycan Badminton Federasiyasına istinadən xəbər verir.
Era Maftuha-Həcər Nuriyeva tandemi qadınların qoşa yarışında ikinci yeri tutub.
Cütlük ilk görüşdə Qazaxıstanı təmsil edən rəqibləri meydançaya çıxmadığı üçün birbaşa yarımfinala vəsiqə qazanaraq, bu mərhələdə Özbəkistandan olan həmkarlarına qalib gəlməklə finala yüksəlib.
Onlar final qarşılaşmasında Rutaparna Panda-Svetaparna Panda duetinə iki setin yekununda məğlub olublar.
Edi Reski Dviçayo və Keişa Fatimə Zəhra isə Tacikistanın Düşənbə şəhərində keçirilən "International" seriyalı beynəlxalq turnirdə 3-cü yeri tutublar.
Kişi badmintonçuların şəxsi yarışında mübarizəyə 1/16 finaldan başlayan Dviçayo Qazaxıstan, Şri-Lanka və Hindistandan olan rəqiblərinə qalib gələrək yarımfinala yüksəlib. O, finalın bir addımlığında Vyetnam badmintonçusu Le Duc Phata 0:2 hesabı ilə uduzub.
Keişa Fatimə Zəhra da eyni nəticəni əldə edib. Qadın badmintonçuların şəxsi yarışında Kipr və Misir badmintonçularına qalib gələn Keişa finala yüksəlmək uğrunda keçirilən görüşdə hindistanlı Anupama Upadhya 0:2 hesabı ilə məğlub olub.
