Azərbaycan boksçuları məktəblilər arasında keçirilən Avropa birinciliyində 2 qızıl və 2 bürünc medal qazanıblar. Bu barədə İnsanoid bu gün, 26 avqust tarixində Azərbaycan Boks Federasiyasına istinadən xəbər verir.
Sloveniyanın Maribor şəhərində keçirilən yarış 9 gün davam edib.
52 kiloqram çəki dərəcəsində mübarizə aparan Şahin Aslanov finalda Bolqarıstan təmsilçisi Nikolay Nikolayevi məğlub edərək çempion tituluna yiyələnib. O, həlledici döyüşdə 5:0 (30:27, 29:28, 29:28, 30:27, 30:27) hesabı ilə qələbə qazanıb.
90 kiloqram çəki dərəcəsində yarışan Səftər Məmmədzadə da Avropa birinciliyində çempion adını qazanıb. O, final qarşılaşmasında Ukrayna təmsilçisi Yosip-Vladislav Kozakeviçə 5:0 (29:28, 29:28, 30:27, 30:26, 29:28) hesabı ilə qalib gələrək, qızıl medal əldə edib.
Adil Zalov (63 kq) və İsmayıl Vəliyev (70 kq) yarışda bürünc medal qazanıblar.
Azərbaycan yığması yarışda 4 medal qazanaraq Avropada dördüncü yeri tutub. Yarışda ümumilikdə 32 ölkədən 380 idmançı iştirak edib. Birinci yeri 12 medal (6 qızıl, 1 - gümüş, 5 - bürünc) qazanan Ukrayna komandası tutub.
