Azərbaycanın səhiyyə naziri Özbəkistandadır. Bu barədə İnsanoid nazirliyin mətbuat xidmətinə istinadən bu gün, 11 oktyabr tarixində xəbər verir.
Daşkənddə Heydər Əliyev Fondunun dəstəyi, Azərbaycan və Özbəkistan səhiyyə nazirliklərinin təşkilatçılığı ilə ümummilli lider Heydər Əliyevin 100 illiyinə həsr olunmuş “Özbəkistan-Azərbaycan Səhiyyə Dekadası" keçirilir.
Səfər çərçivəsində Azərbaycan səhiyyə naziri Teymur Musayevin rəhbərlik etdiyi nümayəndə heyəti Daşkənddə Heydər Əliyev Meydanını və burada ucaldılan böyük memorial kompleksi ziyarət ediblər.
Nümayəndə heyəti ulu öndərin abidəsi önünə tər gül dəstələri qoyub, ümummilli liderin əziz xatirəsi ehtiramla yad edilib.
Sonra nümayəndə heyəti Azərbaycanın Özbəkistandakı səfirliyində olub.
Səhiyyə dekadası çərçivəsində Özbəkistanın səhiyyə naziri Amrillo İnoyatovun Azərbaycanın səhiyyə naziri Teymur Musayevlə ikitərəfli görüşü də keçirilib.
Dekada çərçivəsində Azərbaycanın Səhiyyə Nazirliyinin həkim mütəxəssislərinin özbəkistanlı həmkarları ilə birgə keçirdikləri cərrahi əməliyyatlar, müayinə və müalicə prosedurları yüksək qiymətləndirilib.
Teymur Musayevin rəhbərlik etdiyi nümayəndə heyəti Akademik V.Vahidov adına Respublika İxtisaslaşdırılmış Elmi-Praktiki Cərrahiyyə Mərkəzində birgə əməliyyat olunan vətəndaşlar və Azərbaycandan gələn həkimlərlə görüş keçirib.
Görüşdə qeyd edilib ki, Özbəkistanın müxtəlif regionlarında yaşayan əhaliyə müasir tibbi avadanlıqlar vasitəsilə 100-dən çox birgə cərrahiyyə əməliyyatları icra edilib və müayinələr aparılıb.
Eyni zamanda Respublika İxtisaslaşmış Göz Mikrocərrahiyyə Mərkəzi, Milli Uşaq Tibb Mərkəzi, Elmi-Praktik Travmatologiya və Ortopediya Mərkəzi və M-klinika ilə tanışlıq baş tutub.
