Bakıda keçiriləcək şahmat üzrə Dünya Kubokunun partiyaları Azərbaycan və ingilis dillərində şərh olunacaq. Bu barədə İnsanoid bu gün, 29 iyul tarixində Azərbaycan Şahmat Federasiyasına istinadən məlumat verir.
Yarışın rəsmi saytı vasitəsilə yayımlanacaq görüşlər Azərbaycan dilində Əməkdar məşqçi Anar Allahverdiyev, ingilis dilində isə dünya çempionu Vişvanatan Anand, İndoneziya şahmatçısı İrene Sukandar və hindistanlı beynəlxalq usta Saqar Şah tərəfindən təqdim ediləcək.
Dünya Kubokunu işıqlandırmaq üçün Azərbaycanla yanaşı, Böyük Britaniya, Rusiya, İran, İspaniya, Niderland, Hindistan, Banqladeş, Botsvana, Zambiyadan olan 100-dən çox jurnalist və texniki əməkdaş qeydiyyatdan keçib.
Qeyd edək ki, iyulun 30-da start götürəcək Dünya Kubokunun təntənəli açılış mərasimi bu gün Bakı Konqres Mərkəzində keçiriləcək. Eyni zamanda rəsmi şəxslər və şahmatçıların iştirakı ilə mətbuat konfransı təşkil ediləcək.
Yarışda 80-dən çox ölkədən 206 kişi və 103 qadın şahmatçı mübarizə aparacaq. Görüşlər “Bulvar Marriot” otelində oynanılacaq və hər gün saat 15-00-da start götürəcək.
